काठमाडौं, १६ वैशाख । संस्कृति, पर्यटन तथा नागरिक उड्डयन मन्त्रालयले वी.पी.कोइराला र योगमाया राष्ट्रिय पुरस्कार–२०८१ बाट सम्मानित हुने व्यक्तिको नाम सार्वजनिक गरेको छ ।

मन्त्रालयले एक सूचना जारी गर्दै बीपी कोइराला राष्ट्रिय पुरस्कार दुवै विधामा दुई÷दुई जनालाई र योगमाया राष्ट्रिय पुरस्कार एक जनालाई प्रदान गरिने जनाएको छ ।

यही वैशाख ४ गतेको मन्त्रीस्तरीय निर्णय अनुसार वीपी कोइराला राष्ट्रिय पुरस्कार प्रदान गर्न लागिएको मन्त्रालयले जनाएको छ । मन्त्रालयका अनुसार राजनीतीक दर्शनतर्फ सुनसरीकी मीना सुब्बा र अछामका नयनसिंह कडायतलाई प्रदान गर्ने निर्णय भएको छ । २ लाख राशिको यो पुरस्कार दुई जनालाई एक÷एक लाखका दरले प्रदान गरिनेछ ।

साहित्यतर्फ पाँचथरका तिलविक्रम नेम्बाङ (बैरागी काइँला) र मोरङका भुवन ढुंगानालाई प्रदान गरिने भएको छ । २ लाख राशिको यो पुरस्कार एक÷एक लाखका दरले प्रदान गरिने मन्त्रालयले जनाएको छ ।

यस्तै मन्त्रालयको यही वैशाख ७ गते को निर्णय अनुसार एक लाख राशिको योगमाया राष्ट्रिय पुरस्कार बर्दियाकी डा.निलम कार्की निहारिकालाई प्रदान गरिनेछ । यो पुरस्कार १ लाख राशिको हो । यही वैशाख ७ गतेको मन्त्रीपरिषद्को बैठकले यो पुरस्कार प्रदान गर्ने निर्णय गरेको थियो ।