काठमाडौं, २० चैत । वसन्तकालीन याम (मार्च–मे) नेपालमा हिमाल आरोहण र पदयात्राको लागि उत्तम मानिन्छ, तर मुख्य सिजनको शुरुआतमै विदेशी पर्यटक पर्यटक आगमनमा कमी आएको छ ।

नेपाल पर्यटन बोर्डका अनुसार मार्चमा १ लाख २१ हजार ६ सय ८७ पर्यटक नेपाल भ्रमणमा आएका छन्, जुन गत वर्षको सोही महिनाको तुलनामा ५.१ प्रतिशतले कम हो । गतवर्षको मार्चमा १ लाख २८ हजार १ य ७१ पर्यटक नेपाल घुम्न आएका थिए ।

नेपालमा पर्यटक आगमन कोभिड अघिको लयमा अझै फर्कन सकेको छैन । मार्च २०१९ मा १ लाख २७ हजार ३ सय ५१ पर्यटक नेपाल आएका थिए ।

यस वर्ष मासिक रुपमा पर्यटक आगमन बढ्दै गएको तथ्याङ्कले देखाउँछ, तर गत वर्षको तुलनामा यस वर्षको पर्यटक आगमन दोस्रो महिनाबाट खस्किँदै गएको छ । जनवरीमा २०२४ कै हाराहारी पर्यटक आएका थिए । फेब्रुअरी र मार्चमा त्यस्तो सङ्ख्या घटेको हो ।

यस वर्ष छिमेकी मुलुक भारत र चीन तथा युरोपका मुलुकबाट आउने पर्यटकको सङ्ख्या घटेको छ । कोभिडअघिको तुलनामा पर्यटक आगमन पूर्ण रूपमा पुनरुत्थानको अपेक्षामा रहेका पर्यटन व्यवसायी यसबाट निराश छन् ।

नेपालमा सबैभन्दा धेरै पर्यटक भारतबाट आउने गर्छन्, तर मार्चमा भारतीय पर्यटक ५ दशमलव प्रतिशतले घटेका छन् । गत वर्षको मार्चमा ३० हजार ६९८ भारतीय नेपाल आएकोमा यस वर्षको यसै महिना २१ हजार चार सय १२ पर्यटक घुम्न आएका छन् । वर्षायाममा भारतीय पर्यटक सवार दुई ठूला बस दुर्घटना र अविरल वर्षाले बाढीपहिरो जाँदा घटेका भारतीय पर्यटक अझै पनि बढ्न सकेका छैनन् ।

विगतका महिनामा चीनबाट आउने पर्यटकको सङ्ख्या बढ्दै गए तापनि दुई महिना यता भने चिनियाँ पर्यटक आगमन घट्दै गएका छ ।

यस वर्षको जनवरीसमम्ममा बढ्दो क्रममा रहेको चिनियाँ पर्यटक फेब्रुअरीबाट घटेका छन् । गतवर्षको मार्चमा १२ हजार ९३ चिनियाँ नागरिक नेपाल भ्रमणमा आएकोमा मार्च २०२५ मा ८ हजार २८३ जना नेपाल घुम्न आएका छन् । फेब्रुअरीमा पनि चीनबाट आउने पर्यटकको सङ्ख्या ९ दशमलव ७७ प्रतिशतले घटेको थियो ।

यसैगरी युरोपेली देशबाट घुम्न आउने पर्यटकको संख्या १०.५ प्रतिशतले घटेको छ । अघिल्लो मार्चमा युरोपबाट २८ हजार सात सय ४७ पर्यटक घुम्न आएकोमा यो वर्षको यसै अवधिमा २५ हजार ७ सय ४२ पर्यटक मात्र आएका छन् ।

यस वर्षका मार्चमा अधिकांश देशका पर्यटक घटेका छन् । अमेरिकी देशबाट आउने पर्यटकमा समेत त्यति वृद्धि देखिँदैन । गतवर्षकै हाराहारीमा यस क्षेत्रका नागरिक नेपाल घुम्न आएका छन् । यस वर्षको मार्चमा १३ हजार ९०७ पर्यटक नेपाल घुम्न आएका छन् । गत वर्षको मार्चमा पनि यी देशबाट १३ हजार ४५७ पर्यटक नेपाल आएका थिए ।

यस वर्ष मध्यपूर्वी देशबाट आउने पर्यटकको सङ्ख्यामा सबैभन्दा धेरै वृद्धि देखिएको छ । मार्च २०२५ मा यी देशबाट नेपाल भित्रिएका पर्यटकको सङ्ख्यामा ७९ प्रतिशतले वृद्धि भएको छ । सो अवधिमा मध्यपूर्वी देशबाट २ हजार ७३२ पर्यटक नेपाल भित्रिएका छन् । गत वर्षको मार्चमा यी देशबाट १ हजार ५२७ पर्यटकको आगमन भएको थियो ।