काठमाडौं, २० चैत । मेडिकल राहतसामग्रीसहित नेपाली सेनाको टोली भूकम्प प्रभावित म्यानमार गएको छ ।

म्यानमारमा गत साता गएको विनाशकारी भूकम्पका कारण व्यापक जनधनको क्षति भएपछि सरकारले मेडिकल राहतसहितको नेपाली सेनाको टोली बुधबार त्यसतर्फ पठाएको हो । प्रमुख सेनानी रामचन्द्र श्रेष्ठको नेतृत्वमा २२ सदस्यीय टोली सेनाको ’सी–९२३५ सीएएसए’ विमानबाट बुधबार म्यानमार प्रस्थान गरेको हो । उक्त टोलीमा १२ जना चिकित्सक, ४ जना बन्दोबस्ती सहायताकर्मी र ६ जना चालक दलका सदस्यहरू रहेका जंगी अड्डाले जनाएको छ ।

टोलीमा भूकम्प प्रभावितका लागि औषधि, उपकरणसहित सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरू रहेका छन् । उक्त टोलीले करिब एक साता म्यानमारमा रहेर भूकम्पमा परेर घाइते भएकाहरूको स्वास्थ्य उपचारमा खटिने छन् ।

म्यानमारमा भूकम्पका कारण अहिलेसम्म दुई हजार ५६ जनाको मृत्यु भइसकेको छ भने तीन हजार ९०० भन्दा बढी घाइते भएका छन् । चार दिन बितिसक्दा पनि उद्धार टोलीहरू राहत सामग्री वितरण गर्न सङ्घर्ष गरिरहेका छन् ।