काठमाडौं, १४ चैत । मुलुकको अर्थतन्त्र सुधारोन्मुख देखिएको छ । राष्ट्रिय तथ्याङ्क कार्यालयको राष्ट्रिय लेखा अनुमान अनुसार चालू आर्थिक वर्ष (आव)को दोस्रो त्रैमासिकमा ५ दशमलव १ प्रतिशत आर्थिक वृद्धिदर हासिल हुने प्रक्षेपण गरिएको छ । पछिल्लो त्रैमासिकमा , निमार्ण, कृषि, विद्युत् उत्पादन तथा वितरण र वित्तीय मध्यस्थता लगायत क्षेत्रमा आर्थिक गतिविधि चलायमान भएकाले समग्र अर्थतन्त्रमा सुधारको संकेत देखिएको हो ।

गत आवको दोस्रो त्रैमासिकको तुलनामा चालू आवको अर्थतन्त्रको आकारको अनुमान विस्तार भएको हो । यो मौसमी प्रभाव समायोजन नगरिएको वृद्धिदर हो ।

कार्यालयका अनुसार सबै औद्योगिक क्षेत्रमा धनात्मक वृद्धिदर रहेको अनुमान छ । यद्यपि १८ ओटा औद्योगिक क्षेत्रमध्ये शिक्षा, आवास तथा भोजन र अन्य सेवा क्षेत्रको आर्थिक वृद्धिदर सामान्य रहेको छ ।

चालू आवको पहिलो त्रैमासिकको तुलनामा दोस्रो त्रैमासिकमा २ दशमलव २ प्रतिशत मात्र वृद्धि हुने देखिएको छ ।

मौसमी प्रभाव समायोजन नगरिएको तथ्याङ्क अनुसार गत आवको दोस्रो त्रैमासिकको तुलनामा चालू आवको सोही अवधिमा सबैभन्दा धेरै यातायात तथा भण्डारणसँग सम्बन्धित क्रियाकलापको १४ दशमलव २ प्रतिशत वृद्धिदर रहेको छ । सो अवधिमा खानी तथा उत्खनन क्षेत्रको ९ दशमलव ५, विद्युत् तथा ग्यास क्षेत्रको ९ दशमलव २ प्रतिशत वृद्धिदर कायम छ ।

त्यसैगरी निर्माण सामग्रीहरूको आयात तथा घरेलु उत्पादनको वृद्धिसँगै निर्माण क्षेत्रको कुल मूल्य अभिवृद्धि वृद्धिदर ९ दशमलव १ प्रतिशत हुने प्रारम्भिक अनुमान छ । उत्पादनमूलक उद्योगको वृद्धिदर ७ दशमलव ४ र निक्षेप तथा कर्जामा भएको वृद्धिका कारण वित्तीय तथा बिमा क्षेत्रको मूल्य अभिवृद्धि वृद्धिदर ६ दशमलव ६, व्यापार क्षेत्रको वृद्धिदर ६ दशमलव १ र सूचना तथा प्रविधि क्षेत्रको वृद्धिदर ४ दशमलव ९ प्रतिशत रहने प्रारम्भिक अनुमान गरिएको छ ।

मुलुकको अर्थतन्त्रमा सबैभन्दा धेरै योगदान पुर्‍याउने कृषि क्षेत्रको वृद्धिदर ३ दशमलव २ प्रतिशत मात्र हुने अनुमान गरिएको छ । यसैगरी धानको उत्पादनमा भएको वृद्धिका साथै तरकारी, अमिलो जातको फलफूल तथा हिउँदे फलफूल र पशुपक्षीजन्य उत्पादनमा भएको वृद्धिले यस क्षेत्रको कुल मूल्य अभिवृद्धिमा सकारात्मक प्रभाव परेको देखिन्छ ।

अर्थतन्त्रको दोस्रो ठूलो क्षेत्रका रूपमा रहेको थोक तथा खुद्रा व्यापार क्षेत्रमा स्वदेशी उत्पादनमा भएको वृद्धि तथा प्रमुख व्यापारजन्य वस्तुको आयातमा भएको वृद्धिका कारण केही विस्तार देखिएको छ ।

त्यस्तै औद्योगिक वस्तुको उत्पादनमा क्रमिक सुधार आएका कारण उत्पादनमूलक उद्योग क्षेत्रको वृद्धिमा उल्लेख्य सुधार हुन गएको प्रारम्भिक अनुमान छ । दोस्रो त्रैमासिकमा सार्वजनिक प्रशासन तथा रक्षा २ दशमलव २, स्वास्थ्य ३ दशमलव १, घरजग्गा कारोबार ३ शदमलव १ प्रतिशतले बढ्ने प्रक्षेपण गरिएको छ ।