काठमाडौं, १३ चैत । यस वर्षको वसन्तकालीन यामको हिमाल आरोहणका लागि ५८ जनाले आरोहण अनुमति लिएका छन् ।
पर्यटन विभागका अनुसार चैत ८ गतेसम्म अन्नपूर्ण–१ सहित पाँच वटा हिमाल आरोहणका लागि ८ टोलीका ५८ जनाले आरोहण अनुमति लिइसकेका छन् ।

सो अवधिमा १८ महिला र ४० पुरुषले हिमाल आरोहणका लागि अनुमति लिएका छन्, जसमध्ये सबैभन्दा धेरै अन्नपूर्ण प्रथम हिमाल आरोहणका लागि अनुमति लिएका छन् । यो हिमाल आरोहणका लागि ४ समूहबाट ४२ जनाले अनुमति पाइसकेका छन््, जसमा १२ जना महिला र ३० जना पुरुष छन् ।

अनुमति लिनेमा चिनियाँ नागरिक धेरै

हालसम्मम नेपालसहित २४ देशका आरोहीले आरोहण अनुमति लिएको विभागले जनाएको छ । वसन्तयामका लागि हिमाल आरोहण गर्न अनुमति लिनेमा सबैभन्दा धेरै चिनियाँ नागरिक छन् । हालसम्म चीनबाट मात्रै २० जनाले अनुमति लिइसकेका छन्, जसमध्ये १२ पुरुष र ८ महिला छन् ।

त्यस्तै जर्मनीबाट ४, युक्रेन, इटाली र बेलायतबाट ३÷३, क्यानडा, इस्टोनीया, फिन्ल्यान्ड, हङ्गरी र पेरुबाट २÷२ जनाले हिमाल आरोहणका लागि अनुमति लिएका छन् । सो अवधिमा नेपालबाट भने २ जनाले अनुमति लिएको विभागले जनाएको छ ।

सरकारले हालसम्म जारी आरोहण अनुमतिबाट १ करोड ९ लाख ७५ हजार रुपैयाँ रोयल्टी उठाइसकेको छ ।