काठमाडौं, १० चैत । राष्ट्रिय आविष्कार केन्द्रका अध्यक्ष महावीर पुनले ऊर्जा, जलस्रोत तथा सिँचाइ मन्त्री दीपक खड्कामाथि कटाक्ष गरेका छन् । सामाजिक सञ्जाल फेसबुकमा स्टाटस सार्वजनिक गर्दै उनले ‘अहिलेको जमानामा दिउँसै रात पार्न खोजेका छन्’ भन्दै कटाक्ष गरेका हुन् ।

विद्युत प्राधिकरणका कार्यकारी निर्देशक कुलमान घिसिङलाई हटाउन लागिपरेका मन्त्री खड्कालाई विवेकहीन र लोभिपापीको संघ्या दिँदै भित्रभित्रै धेरै भ्रष्टाचार गरेको हुन सक्ने उनले बताए । ‘अहिलेको ऊर्जामन्त्री जस्तो विवेकहीन र लोभिपापी व्यक्तिले अहिलेसम्म भित्रभित्रै कति भ्रष्टाचार गरे होलान् भनेर सजिलै अनुमान गर्न सकिन्छ,’ उनले स्टाटसमा लेखेका छन्, ‘राम्रो काम गर्ने व्यक्तिलाई हटाउन मरि मेटेर लाग्ने मन्त्रीलाई भोट हाल्ने जनताहरूले एकपटक सोच्नु होस् । अहिलेको जमानामा दिउँसै रात पार्न खोजेका छन् गाँठे ।’

मन्त्री खड्कालाई महावीर पुनले जनतासँग माफि माग्न समेत सुझाएका छन् । ‘ऊर्जामन्त्रीज्यू कि त कुलमान घिसिङले भन्दा जनताको चित्त बुझ्ने गरेर राम्रो काम गर्नुहोस् नत्र भने माफी माग्नुहोस् । माफी दिन्छन् जनताले ।’

२१औं शताब्दीमा विद्युत् नै अर्थतन्त्रको बलियो आधार रहेको उनले उल्लेख गरे ।