काठमाडौं, १८ चैत । प्रधानमन्त्री तथा नेकपा एमालेका अध्यक्ष केपी शर्मा ओली पहिलोपटक नेकपा एकीकृत समाजवादीको केन्द्रीय कार्यालय आलोकनगर पुगेका छन् ।

आइतबार दिवंगत भएका नेकपा एस सम्वद्ध वरिष्ठ पत्रकार तथा लेखक कमल कोइरालालाई अन्तिम श्रद्धाञ्जली दिन ओली आलोकनगर पुगेका हुन् ।

त्यस क्रममा ओलीले नेकपा एसको कार्यालय पनि अवलोकन गरेको ओलीको निजी सचिवालयले जनाएको छ । प्रधानमन्त्री ओली पुग्दा नेकपा एसका अध्यक्ष माधवकुमार नेपाल, महासचिव घनश्याम भुसाल लगायतका नेताहरू पनि थिए । ओलीले उनीहरूसँग केहीबेर कुराकानी गरे । त्यसपछि चैत १५ गते आगजनीबाट क्षति पुगेको संरचना अवलोकन गरेका थिए ।

शुक्रबार राजावादी प्रदर्शनकारीले नेकपा एसको कार्यालयमा तोडफोड गर्नुका साथै आगजनीसमेत गरेका थिए ।