काठमाडौं, १८ चैत । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले राजा हटाएपछि नारायणहिटीमा व्यापार गर्न र लुट मच्चाउन खोजिएको आरोप लगाएका छन् ।

सोमबार बसेको संसद् बैठकलाई सम्बोधन गर्दै लिङ्देनले भने, ‘सबै कुराको जवाफ दिन मसँग समय छैन । मेरा मित्रलाई भन्छु अब कथाले, शब्दजालले अबको पुस्ता मान्ने छैन । तपाईंको मिथ्यांकले मिथ्या इतिहासले अब मान्छे पत्याउनेवाला छैन । अहिलेको डिजिटल युग, सूचना प्रविधिको विकास तयसबाट युवा राम्रोसँग परिचित छ,’ लिङ्देनले भने, ‘तपाईंले किन राजा हटाउनुभएको रहेछ ? राजा हटाएपछि नारायणहिटीमा तुरुन्तै व्यापार गर्न कसले खोज्यो । तपाईं राजा हटाएर देशमा लोकतन्त्र र गणतन्त्रको नाममा कुन खालको लुटतन्त्र मच्चाउन खोज्नुभएको छ हेरिरहेको छ ।’

लिङ्देनले जनताले चाहेको खण्डमा गणतन्त्र उल्टिनसक्ने बताए । ‘तपाईंले जबसम्म व्यवहार सुधार गर्नुहुन्न तबसम्म गणतन्त्रको विरोध मात्रै होइन, उल्ट्याउँछन् नै,’ अध्यक्ष लिङ्देनले भने, ‘जनताले चाह्यो भने यो गणतन्त्र जान्छ । युवाको शक्तिलाई नहोच्याउनुस् ।’

साथै, उनले गत १५ चैतमा तीनकुनेमा भएको प्रदर्शनमा आन्दालनकारीले मात्रै नभइ सरकारले पनि ज्यादती गरेको बताए । उनले भने, ‘अस्ति १५ गते आन्दोलनकारीले मात्रै ज्यादती गरेको हो ? त्यसको नियन्त्रण गर्ने जिम्मा सरकारको होइन ? तपाईं कांग्रेस एमाले भन्नेहरू आज यो सत्तामा भजन किर्तन गर्दै आएको हो ? तोडफोड नगरी आएको हो ? मान्छे नमारी आएको हो ?’