काठमाडौं, १८ चैत । राष्ट्रिय स्वतन्त्र पार्टी (रास्वपा)का सांसद मनिष झाले कर्मचारी मन्त्रीप्रति लोयल हुने कि देशप्रति भन्दै प्रश्न गरेका छन् । आजको प्रतिनिधिसभाको बैठकमा प्रधानमन्त्री केपी शर्मा ओलीको भनाइलाई उदृढ गर्दै झाले यस्तो प्रश्न गरेका हुन् ।

‘आज प्रधानमन्त्रीले अर्को एउटा कुरा भनेर जानुभयो कि एउटा कर्मचारीको सरुवा हुँदै गर्दा ऊ मन्त्रीप्रति लोयल हुने,’ उनले भने, ‘कर्मचारी मन्त्रीप्रति लोयल हुने कि देशप्रति ?’

विपक्ष दलका सांसदहरूले उठाएका सवालको जवाफ दिने क्रममा प्रधानमन्त्री ओलीले कुनै पनि कर्मचारीबाट विभागीय मन्त्रीले आफूप्रति लोयल्टी फिल गरेन भने हटाउन सक्ने बताएका थिए ।

‘मन्त्रीको चाप्लुसी गर्न कर्मचारी आउछ ? कस्तो कुरा गरेर जानुभयो उहाँले,’ सांसद झाले प्रश्न गरे, ‘मन्त्रीप्रति लोयल भएन त्यसैले सरुवा गरियो रे ।’

राज्यप्रति, जे कार्यभार लिएर आएको त्योप्रति, उसको संस्थाको लक्ष्यप्रति लोयल हुने कर्मचारी आवश्यक रहेको उनको भनाइ छ ।