काठमाडौं, १७ चैत । नेपाल राष्ट्र बैंकले ५ सय रुपैयाँका २३ करोड थान नयाँ नोट छपाईका लागि बोलपत्र आह्वान गरेको छ ।

राष्ट्र बैंकले आइतबार एक सूचना जारी गर्दै नोटको डिजाइन, प्रिन्टिङ तथा आपूर्तिका लागि योग्य बोलपत्र दाताबाट आवेदन मागेको हो ।

राष्ट्र बैंकले यसअघि नै बोलपत्र आवेदनका लागि योग्य ६ कम्पनीको सूची सार्वजनिक गरेको छ । ती योग्य आवेदकमा चीन, अमेरिका, जर्मनी, रसिया, फ्रान्स र पोल्यान्डका कम्पनी छन् । यीमध्ये इच्छुक आवेदकले आगामी १४ मे १२ बजेसम्म मुद्रा व्यवस्थापन विभाग थापाथलीमा आइपुग्नेगरी बोलपत्र खरिद गरिसक्नुपर्ने छ ।

प्रतिबोलपत्र २० हजार रुपैयाँ अथवा १४४ अमेरिकी डलर, १३३ युरो वा ११२ पाउन्ट स्टेर्लिङ लाग्ने राष्ट्र बैंकले जनाएको छ ।

कम लागतमा बैंक नोट छाप्ने प्रस्ताव पेस गर्ने कम्पनीलाई राष्ट्र बैंकले बैंक नोट छाप्ने ठेक्का दिनेछ ।