काठमाडौं, १५ चैत । आज शुक्रबार काठमाडौँका दुई स्थानमा छुट्टाछुट्टै प्रदर्शन हुँदैछ । नेकपा माओवादी केन्द्रसहितको समाजवादी मोर्चा र राजावादीहरूले प्रदर्शन गर्न लागेका हुन् । जिल्ला प्रशासन कार्यालय काठमाडौँले मोर्चालाई भृकुटीमण्डप र राजवादीलाई तीनकुनेमा सभा गर्न ठाउँ तोकिदिएको छ ।

एसईई परीक्षा जारी रहेकाले दुवैले बिहान ११ बजेपछि मात्रै प्रदर्शन सुरु गर्ने जनाएका थिए । सोहीअनुसार अहिले प्रदर्शनकारीहरू विभिन्न ठाउँबाट जुलुस निकाल्न थालेका छन् ।

समाजवादी मोर्चाले विभिन्न क्षेत्रबाट जुलुस निकालेका छन् । उनीहरू भृकुटीमण्डपमा जम्मा भएर सभा गर्दैछन् । सभालाई माओवादी केन्द्रका अध्यक्ष प्रचण्ड, एकीकृत समाजवादीका अध्यक्ष माधव नेपाल, नेकपा महासचिव विप्लव र नेसपाका अध्यक्ष महिन्द्रराय यादवले सम्बोधन गर्दै छन् ।

यसैगरी राजावादी पक्षको प्रदर्शनको नेतृत्व मेडिकल व्यवसायी दुर्गा प्रसाईंले गर्दैछन् । सो प्रदर्शनलाई राप्रपालगायत राजावादी दलहरूको समर्थन छ । अहिले तिनकुनेमा राजावादीहरू भेला हुन थालेका छन् । राजसंस्था पुनस्थापना र हिन्दू राज्यसहितका माग गर्दै उनीहरूले प्रदर्शन उत्रिएका हुन् ।

राजावदीहरूका लागि तय भएका विभिन्न क्षेत्रबाट जुलुस निस्किएका छन् । चाबहिलबाट राजतन्त्र पुनस्थापना अभियानका संयोजक नवराज सुवेदीको टोलीले ¥याली निकालेका छन् । उनीहरू गौशाला–एयरपोर्ट–सिनामंगल हुँदै तिनकुने पुग्ने कार्यक्रम छ ।

उनीहरूको प्रदर्शनलाई लिएर प्रहरीले सुरक्षा सतर्कता बढाएको छ ।

तस्बिरहरू