काठमाडौं, ९ माघ । नेपाल आईसीसी यू–१९ महिला टी २० विश्वकपको समूह चरणबाटै बाहिरिएको छ । बुधबार मलेसियाको बांगीमा भएको समूहचरणको अन्तिम खेलमा अष्ट्रेलियासँग पराजित भएसँगै नेपालको सुपर सिक्स यात्रा अन्त्य हुनुका साथै प्रतियोगिताबाटै बाहिरिएको हो ।

समूह डी मा रहेको नेपाल बुधबार समूह चरणको अन्तिम खेलमा अस्ट्रेलियासँग ८३ रनले पराजित भयो । अस्ट्रेलियाले दिएको १४० रनको लक्ष्य पछ्याएको नेपालले निर्धारित २० ओभरमा ८ विकेट गुमाएर ५६ रन मात्र बनाएको छ । यो नेपालको लगातार तेस्रो हार हो ।

नेपालका लागि कप्तान पुजा महतोले सर्वाधिक १८ रन बनाइन् । त्यस्तै अलिशा यादवले ९ रन, साना प्रविनले ८ रन, सिमाना केसीले ६, सावित्री धामीले ७ रन जोडिन् । अस्ट्रेलियाका लागि हसरत गिल, जुलियट मोर्टन र लिली बासिङथ्वाइटले २–२ विकेट लिए भने कोल एइन्सवर्थले १ विकेट लिइन् ।

त्यसअघि मलेसियाको बांगीस्थित युएसडी–युकेएम ओभलमा टस जितेर पहिले ब्याटिङ गरेको अष्ट्रेलियाले पूरै २० ओभर खेल्दै ६ विकेट गुमाएर १३९ रन बनाएको थियो ।

नेपाल पहिलो खेलमा बंगलादेश तथा दोस्रो खेलमा स्कटल्याण्डसँग पराजित भएको थियो ।