भूकम्पपछि चीनले अस्थायी रूपमा बन्द गर्यो सगरमाथा क्षेत्र
अनलाइनसमय |
काठमाडौं, २३ पुस । मंगलबार बिहान सिचाङ स्वायत्त क्षेत्रको डिङ्ग्री काउन्टीमा गएको ६.८ म्याग्निच्युडको भूकम्पपछि चीनले सगरमाथा क्षेत्र अस्थायी रूपमा बन्द गरेको छ ।
सगरमाथा ( (चिनियाँ भाषामा माउन्ट कोमोलाङ्मा) क्षेत्र अस्थायी रूपमा बन्द गरिएको हो ।
चीनको क्षेत्रीय विपद् व्यवस्थापन मुख्यालयका अनुसार, भूकम्पमा परी ९५ जनाको मृत्यु भएको भने १३० जना घाइते भएका छन् ।
डिङ्ग्री विश्वकै सबैभन्दा अग्लो चुचुरो सगरमाथाको आधार शिविर रहेको क्षेत्र हो । डिङ्ग्री संस्कृति तथा पर्यटन ब्यूरोका अनुसार कोमोलाङ्मा क्षेत्रमा होटल भवन र वरपरको क्षेत्र अस्तव्यस्त रहेको र पर्यटक तथा कर्मचारी सुरक्षित रहेका छन् ।
डिङ्ग्रीमा रहेको चिनियाँ विज्ञान प्रतिष्ठानको वायुमण्डलीय तथा वातावरणीय अनुसन्धान केन्द्र (चोमोलोङ्मा स्टेसन) मा विद्युत आपूर्ति अवरुद्ध भएको छ ।
मौसम पूर्वानुमान महाशाखाले डिङ्ग्रीको तापक्रम माइनस १८ डिग्री सेल्सियसदेखि शून्यभन्दा तलसम्म रहेको जनाएको छ । सगरमाथा क्षेत्रमा नेपालतर्फबाट भने अहिले कुनै गतिविधि हुँदैनन् ।
