काठमाडौं, १९ पुस । महुली लघुवित्तको एफपिओ शुक्रबार बाँडफाँट भएको छ ।

बिक्री प्रबन्धक लक्ष्मी सनराइज क्यापिटल कार्यालय नयाँ बानेश्वर काठमाडौँमा आज एफपिओ बाँडफाँट भएको हो । जसमा ४७ हजार ५५४ आवेदकले १० कित्ताका दरले शेयर पाएका छन् । त्यस्तै, नौ जनाले थप एक कित्ता शेयर प्राप्त गरेका छन् भने एक जना आवेदकले ०.१५ कित्ता प्राप्त गरेका छन् ।

सो शेयर खरिदका लागि कुल १६ लाख ९२ हजार १ सय ६ आवेदकले २ करोड २८ लाख ५२ हजार ८० कित्ताका लागि आवेदन दिएका थिए । तीमध्ये १६ लाख ८७ हजार ७ सय ७४ आवेदन स्वीकृत भएको थियो भने ४ हजार ३ सय ३२ आवेदन रद्द भएको थियो ।

कम्पनीले पुस ५ देखि ९ गतेसम्म प्रतिकित्ता १०० रूपैयाँ अंकित मूल्यका ४ करोड ७५ लाख ४४ हजार ९१५ रूपैयाँ बराबरको ४ लाख ७५ हजार ४४९.१५ कित्ता एफपिओ जारी गरेको थियो ।

लगानीकर्ताले बिक्री प्रबन्धक लक्ष्मी सनराइज क्यापिटलको वेबसाइट, मेरो शेयर एकाउन्ट वा कम्पनीको वेबसाइटमा गएर नतिजा हेर्न सक्नेछन् । त्यस्तै, सिडिएस एन्ड क्लियरिङको वेबसाइटबाट पनि नतिजा हेर्न सकिन्छ ।