काठमाडौं, ९ पुस । राष्ट्रिय स्वतन्त्र पार्टी रास्वपाले पार्टी सभापति रवि लामिछानेलाई सांसदबाट गरिएको निलम्बनविरुद्ध अदालत जाने भएको छ । राजनीतिक पूर्वाग्रह प्रेरित भएर कानून विपरित निलम्बन गरिएको भन्दै रास्वपाले अदालत जाने तयारी गरेको हो ।

सभापति लामिछानेविरुद्ध अदालतमा मुद्दा दायर भएसँगै कास्की प्रहरीले संसद सचिवालयलाई पत्र पठाएको थियो । सोही पत्रमा टेकेर सभामुखले मुद्दाको फैसला नआउँदासम्म रविलाई निलम्बन गरेका थिए । रास्वपाले यसमा आपत्ति जनाएको छ ।

सोमबार रास्वपाका तीन सांसदहरुले सभामुख देवराज घिमिरेलाई भेटेर तत्काल निलम्बन नगर्न आग्रह गरेका थिए । पार्टीका प्रमुख सचेतक सन्तोष परियार, सांसदद्वय सोभिता गौतम र गणेश पराजुलीले सभामुखलाई भेटेर पुर्पक्षको सुनवाइभन्दा अगाडि नै निलम्बन गर्न नमिल्ने तर्क गरेका थिए । सभामुखले भने आफूले कानूनसम्मत निर्णय लिने आश्वासन दिए । तर बेलुका निलम्बनको सूचना आएको थियो ।

रास्वपाका सभापति लामिछानेमाथि जिल्ला सरकारी वकिलको कार्यालय कास्कीले आइतबार सहकारी ठगी, सम्पत्ति शुद्धीकरण र संगठित अपराधमा जिल्ला अदालत कास्कीमा मुद्दा दायर गरेको गरेको छ । सम्पत्ति शुदीकरणमा मुद्दा दर्ता भएपछि उनको सांसद पद स्वतः निलम्बनमा पर्ने कानुनी व्यवस्था छ ।