84 Views
काठमाडौं, १२ मंसिर । वैदेशिक रोजगारमा पठाइदिन्छु भन्दै १७ लाख ४५ हजार रूपैयाँ ठगी गरेको अभियोगमा २ जनालाई प्रहरीले पक्राउ गरेको छ । काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले आकर्षक तलबको प्रलोभनमा पारी विभिन्न देश पठाइदिन्छु भन्दै सो रकम ठगी गरेको अभियोगमा उनीहरुलाई पक्राउ गरेको हो ।
पक्राउ पर्नेमा मकनवानपुर बकैया गाउँपालिका–५ घर भई काठमाडौं नागार्जुन नगरपालिका–५ सितापाइला बस्ने ३९ वर्षीय सुवर्ण कुमार बल र सर्लाही ब्रम्हपुरी गाउँपालिका–३ घर भई काठमाडौं टोखा नगरपालिका–८ बस्ने २८ वर्षीया मनिषा कुमारी रहेका छन् ।
पक्राउ परेकामध्ये सुवर्णले क्रोएसिया पठाइदिन्छु भन्दै १५ लाख रूपैयाँ र मनिषाले दुवई पठाइदिन्छु भन्दै २ लाख ४५ हजार रूपैयाँ लिएको प्रहरीले जनाएको छ ।
प्रहरीकाअनुसार उनीहरुलाई थप अनुसन्धानका लागि वैदेशिक रोजगार विभाग ताहाचल पठाइएको छ ।
