140 Views
काठमाडौं, ८ जेठ । काठमाडौं महानगरपालिकाले न्युरोडको पार्किङ हटाएको ठाउँमा फुटपाथ निर्माण गर्ने भएको छ । महानगरपालिकाले साविक पार्किङ हुँदै गरेको स्थानमा पार्किङ हटाएर फुटपाथ विस्तार गर्न लागेको हो ।
महानगरपालिका ट्राफिक व्यवस्थापन विज्ञ जगतमान श्रेष्ठले न्युरोडदेखि काठमाडौं दरबार स्क्वायरको गेटसम्म दायाँबाँया ३–३ मिटर फुटपाथ विस्तार गर्न लागेको बताए ।
महानगरपालिकाका सहायक प्रवक्ता दीपक अधिकारीले न्युरोडमा फुटपाथ बनाउन ३ करोड १९ लाख २० हजार रुपैयाँ लागत अनुमान गरिएको बताए । उक्त अनुमान राखेर महानगरपालिकाले ८ मंसिर २०८० मा टेन्डर आह्वान भएको थियो । जसमा २ करोड ५६ लाख ९५ हजारमा टेन्डर स्वीकृत भइसकेको छ ।
महानगरपालिकाका अनुसार ७ मिटर मात्रै कालोपत्रे हुन्छ अर्थात् दुई लेनको कालोपत्रे सडक बाहेक स्थान अब फुटपाथ हुन्छ । न्यूरोड क्षेत्र हुँदै सम्पदा अवलोकन गर्ने र व्यावसायिक प्रयोजनका लागि जानेलाई पनि फुटपाथमा हिँडाउने महानगरपालिका जनाएको छ ।
काठमाडौं महानगरपालिकाले न्युरोड क्षेत्रमा ९ माघ २०८० देखि न्युरोड क्षेत्रका कालोपत्रे सडकमा सवारी पार्किङमा रोक लगाएको थियो ।
