94 Views
प्रतिनिधि सभाको बैठक निर्धारित समयमा सुरु हुन सकेको छैन । शुक्रबार बिहान ११ बजे बोलाइएको प्रतिनिधि सभाको बैठक बोलाइएको थियो । तर, दलहरु आन्तरिक र दुईपक्षीय छलफलमा रहेका कारण प्रतिनिधि सभाको बैठक प्रभावित भएको हो ।
नयाँबानेश्वरस्थित संसद भवनमा प्रमुख प्रतिपक्षी नेपाली कांग्रेस, राष्ट्रिय प्रजातन्त्र पार्टी (राप्रपा), जसपा नेपाल, लोकतान्त्रिक समाजवादी पार्टी (लोसपा) सहितका विपक्षी दलहरु छलफलमा छन् ।
यता सत्तारुढ दलमा आवद्ध दलका शीर्ष नेताहरु पनि छलफलमा जुटेका छन् । नेकपा एमालेका अध्यक्ष केपी शर्मा ओली, नेकपा माओवादी केन्द्रका अध्यक्ष पुष्पकमल दाहाल प्रचण्ड, राष्ट्रिय स्वतन्त्र पार्टी (रास्वपा)का सभापति रवि लामिछानेबीच सिंहदरवारमा छलफल जारी छ ।
सत्तापक्ष र विपक्षी दलहरुको छुट्टाछुट्टै छलफल चलिरहेका कारण प्रतिनिधि सभाको बैठक अगाडि बढाउने सन्दर्भमा प्रतिनिधि सभाको कार्यव्यवस्था तथा परामर्श समितिको बैठकले निर्णय लिन सकिरहेको छैन । सभामुख देवराज घिमिरेले प्रमुख सचेतक र सचेतकहरुसँग छलफल गरिरहेका छन् । शीर्ष नेताहरुको निर्णय प्राप्त भएपछि प्रतिनिधि सभा कसरी अगाडि बढाउने भन्ने विषय तय हुन्छ ।
नेपाली कांग्रेसले उपप्रधान तथा गृहमन्त्री रवि लामिछानेमाथि सहकारीको रकम अपचलन गरेको आरोप लगाउँदै आएको छ । यसमा संसदीय छानबिन समिति गठन गर्नुपर्ने माग राख्दै आएको छ । सत्ता पक्ष छअनविन समिती बनाउन तयार नदेखिएपछि कांग्रेसले संसद् अवरोध गर्दै आएको छ ।
बिहीबार प्रतिनिधि सभाको बैठकमा कांग्रेस र एमालेका सांसदहरुबीच धकेलाधकेल नै भएको थियो ।
शुक्रबार बिहान बसेको कांग्रेस संसदीय दलको बैठकले बिहीबारको घटनाको निन्दा गरेको छ । कांग्रेसले सभामुखको भूमिका माथि समेत प्रश्न उठाएको छ ।
