जनकपुरमा के भएको भनेर मेरो आज विहान मात्र प्रधानमन्त्रीजीसँग छलफल भयो – प्रचण्ड

Posted: Monday
जनकपुरमा के भएको भनेर मेरो आज विहान मात्र प्रधानमन्त्रीजीसँग छलफल भयो – प्रचण्ड

 फागुन २७, काठमाडौं । सरकारसँग मूलधारको राजनीतिमा आउने सहमति गरेको सिके राउत समूहले जनकपुरमा स्वतन्त्र मधेसको नारा लगाएपछि सत्तारुढ नेकपा अध्यक्ष पुष्पकमल दाहाल ‘प्रचण्ड’ले यसबारे प्रधानमन्त्री केपी शर्मा ओलीसँग कुराकानी गरेको बताएका छन्  ।

पोखरामा सञ्चारकर्मीहरुसँग कुरा गर्दै प्रचण्डले भने, जनकपुरमा के भएको भनेर मेरो आज विहान मात्र प्रधानमन्त्रीजीसँग छलफल भएको थियो,’ ‘यो खाली व्यवहारिक रुपले आफ्नो समूहलाई भएको सहमतिको स्पिरिटबारे बुझाउने समय प्रक्रियाका कारणले मात्र त्यसो भएको हो । सरकारलाई कुनै आशंका छैन भनेर प्रधानमन्त्रीजीले जवाफ दिनु भएको छ ।’

सबै राजनीतिक प्रवृत्तिलाई समेटेर संविधानको मर्मअनुसार मूलधारको राजनीतिमा ल्याउन प्रयास गर्नु सरकारको जिम्मेवारी भएको भन्दै उनले सरकारको नियतमाथि शंका नगर्न आग्रह गरे । ‘यदि सहमति विपरित जान थाल्यो भने के गर्ने भन्ने निर्णय गर्ने अधिकार सरकारसँग सुरक्षित छ,’ उनले भनेका छन् ।

प्रचण्डले सहमतिको भाषा द्विअर्थी जस्ता भएका कि भन्ने प्रश्न उठेपनि गृहमन्त्रीले संसदमा जवाफ दिइसकेको बताए । सरकारले चाहँदैमा जनमत संग्रह हुन नसक्ने र संसदबाट दुई तिहाईले निर्णय गर्नुपर्ने संवैधानिक व्यवस्था रहेको स्मरण गरे ।