झाडु र बेल्चा लिएर गृहमन्त्री थापा सडक सफाइमा

Posted: Thursday
झाडु र बेल्चा लिएर गृहमन्त्री थापा सडक सफाइमा

मंसिर ६, भक्तपुर । गृहमन्त्री रामबहादुर थापा बिहीबार बिहान लोकन्थलीमा भेटिए। उनको हातमा झाडु थियो भने अर्को हातमा बेल्चा। फूलमाला लगाएर सडकमा निस्किएका उनले एकछिन सडक बढारे र फोहरका टुक्राटुक्री टिपे । हातमा पन्जा र मुखका मास्क लगाएर गृहमन्त्री थापाले बिहीबार अरनिको राजमार्ग सफाइ अभियानको शुरुवात गरेका हुन् ।

भक्तपुरका विभिन्न नगरपालिकाले सुरू गरेको  सफा, स्वच्छ र सुरक्षित भक्तपुर अभियानको पहिलो दिन गृहमन्त्री थापा पनि सडक सफाइमा जुटेका हुन्। थापासँगै भक्तपुरका सांसद महेश बस्नेतलगायत अन्य पनि सडक सफाइमा सहभागी थिए।

अरनिको राजमार्गको मनोहरा खोलादेखि साँगासम्मको सडक सफा, सुरक्षित र फराकिलो पार्न अभियान सुरू भएको हो। महिनादिनभित्र यो सडकमा दुर्घटना घटाउने, सरसफाइ बढाउने र सडक अतिक्रमण गरेका घर टहरा हटाउने अभियानको लक्ष्य छ। सरसफाइ कार्यक्रमको आयोजना जिल्ला प्रशासन कार्यालय भक्तपुरले गरेको हो । रासस